Gall y syniad o ymuno â chymdeithas, neu fynd i ddigwyddiad, ysgogi teimladau o gyffro, nerfusrwydd neu ansicrwydd. Ond gallai’r ffaith eich bod yn ddigon dewr i roi cynnig ar rywbeth fod yn gam cyntaf tuag at wella eich profiad o’r brifysgol. Os ydych chi’n poeni am fynd i gymdeithas neu ddigwyddiad am y tro cyntaf, dyma nifer o awgrymiadau:
Digwyddiadau yn eich prifysgol neu ddinas
Mae darnau amrywiol yn y pecyn cynnwys hwn wedi cyfeirio at yr effaith gadarnhaol y gall adeiladu cymuned ei chael ar fyfyrwyr Du. Gall cyfarfod â myfyrwyr Du eraill, a chymryd rhan mewn digwyddiadau cymunedol a diwylliannol, eich helpu i gael ymdeimlad o berthyn a chyfeillgarwch ac, yn y pen draw, gall wella eich llesiant meddyliol.
Ewch gyda ffrind dibynadwy
Does dim byd o'i le ar fynd i gymdeithas ar eich pen eich hun – a dweud y gwir mae'n gyffredin yn y brifysgol, lle mae’n ddigon posibl bod myfyrwyr yn newydd yno ac felly heb ffurfio’u cylch ffrindiau eto. Fodd bynnag, os yw’r syniad o gyrraedd y digwyddiad ar eich pen eich hun yn peri i chi beidio â mynd i ddigwyddiadau, ystyriwch ofyn i ffrind dibynadwy ddod gyda chi.
Cysylltwch â'r trefnydd ymlaen llaw
Mae pwyllgorau cymdeithasau yn awyddus i aelodau newydd ymuno â nhw a helpu i ehangu eu grŵp. Felly, mae'n debygol y byddan nhw’n falch o glywed bod gennych chi ddiddordeb mewn ymuno. Os ydych chi’n teimlo’n ansicr, dewch o hyd i gyfeiriad e-bost, neu gyfrif cyfryngau cymdeithasol y gymdeithas, ac anfonwch neges atyn nhw. Gallech chi ofyn am ragor o fanylion am y digwyddiadau sydd i ddod, neu eglurwch eich bod chi’n teimlo ychydig yn nerfus am fynychu am y tro cyntaf, os ydych chi’n teimlo’n ddigon cyfforddus i wneud hynny. Gallwch chi bob amser ofyn i aelod o'r pwyllgor gwrdd â chi pan fyddwch chi’n cyrraedd a helpu i'ch cyflwyno chi i’r aelodau.
Peidiwch â rhoi'r gorau iddi
Mae’n brofiad cyffredin i fyfyrwyr roi cynnig ar nifer o wahanol gymdeithasau a digwyddiadau a chanfod nad ydynt at eu dant nhw. Peidiwch â digalonni os nad yw'r digwyddiad cyntaf yr ydych chi’n mynd iddo neu'r gymdeithas gyntaf yr ydych chi’n mynd iddi yn addas ar eich cyfer. Bydd digon o opsiynau eraill i chi roi cynnig arnyn nhw, a chofiwch fod pob ymgais aflwyddiannus yn golygu y byddwch chi’n gam yn nes at ddod o hyd i’r gymdeithas sydd at eich dant chi.
Sut i ddod o hyd i ddigwyddiadau sy’n lleol i'ch prifysgol
Defnyddiwch eich undeb neu urdd fyfyrwyr i ddod o hyd i ddigwyddiadau perthnasol. Fel arfer, bydd eu gwefan yn rhestru'r holl glybiau a chymdeithasau sydd ar gael i chi ymuno â nhw. Mae gan y mwyafrif o sefydliadau Gymdeithas Affricanaidd-Caribïaidd neu rwydwaith ar gyfer myfyrwyr Du sydd, ym marn llawer o fyfyrwyr Du, yn lle gwych i feithrin cyfeillgarwch, cymuned ac ymdeimlad o berthyn; ac nid yw’n ofynnol ganddynt eich bod yn fyfyriwr rhyngwladol o wlad Affricanaidd neu Garibïaidd. Yn aml, bydd yna gymdeithasau eraill a allai fod o ddiddordeb i chi, megis cymdeithasau ar gyfer gwledydd Affricanaidd a Charibïaidd penodol, a chymdeithas ar gyfer myfyrwyr cwiar, traws a rhyngryw o liw.
Os ydych chi'n byw mewn tref neu ddinas lle mae nifer o brifysgolion, efallai y byddwch chi'n gallu cael mynediad at ddigwyddiadau sy'n cael eu cynnal mewn prifysgolion ar wahân i’ch prifysgol chi. Cysylltwch â'r trefnwyr yn uniongyrchol i wirio a yw hyn yn wir.
Digwyddiadau sydd ar y gweill
Ydych chi'n cynnal digwyddiad ar gyfer myfyrwyr Du yn eich sefydliad chi? Cwblhewch y ffurflen hon i gael eich cynnwys ar y dudalen we hon a helpu mwy o fyfyrwyr i ddod o hyd i'ch digwyddiadau chi. Gwnewch yn siŵr eich bod yn nodi a yw'r digwyddiad ar gyfer myfyrwyr sydd wedi cofrestru yn eich prifysgol chi yn unig, neu a oes croeso i fyfyrwyr o brifysgolion lleol eraill.
Dim digwyddiadau i ddod
Sylwch fod yr holl ddigwyddiadau isod yn cael eu cynnal yn annibynnol a dydyn nhw ddim yn gysylltiedig â Student Minds na Chornel Myfyrwyr. Cysylltwch â'r trefnwyr yn uniongyrchol i gael rhagor o wybodaeth.
Adolygwyd ddiwethaf:
Awst 2024