Llywio ynysigrwydd a dieithrwch fel myfyriwr Du

Fel rhywun sy’n dod o gefndir diwylliannol amrywiol nad yw’n cael ei adlewyrchu yn y sefydliadau gwyn yn bennaf sy’n fy amgylchynu ar hyn o bryd, roedd y datgysylltu diwylliannol a deimlais wrth symud yma yn ei gwneud hi’n anodd i mi ddod o hyd i ymdeimlad o berthyn. Nid oedd y cwricwlwm, y digwyddiadau cymdeithasol, a hyd yn oed yr opsiynau bwyd oedd ar gael ar y campws yn atseinio gyda fy mhrofiadau diwylliannol, a gwnaeth hyn gynyddu fy nheimladau o ynysigrwydd.

Un o'r cyfranwyr mwyaf arwyddocaol at deimladau o ddieithrwch yw'r diffyg cynrychiolaeth ymhlith cyfadran, staff a chyfoedion. Pan nad yw myfyrwyr yn gweld eu hunain yn cael eu hadlewyrchu yn y rhai o'u cwmpas, gall wneud yr ymdeimlad o ddieithrwch hyd yn oed yn gryfach. Gall y diffyg amrywiaeth hwn hefyd olygu llai o fentoriaid sy'n deall ein heriau a'n profiadau unigryw.

Mae hiliaeth, boed yn amlwg neu'n gynnil, yn fater treiddiol sy'n ein hwynebu ni fel myfyrwyr Du. Gall microymosodiadau – sarhadau geiriol, dieiriau ac amgylcheddol bob dydd – gronni ac effeithio'n sylweddol ar ein hiechyd meddwl a'n teimladau o gynhwysiant. Gall y profiadau hyn arwain at amgylchedd anghyfeillgar neu ddigroeso, gan ein dieithrio ymhellach.

Fel myfyrwyr Du, rydym yn aml yn ymgodymu â stereoteipio a rhagfarn sy'n effeithio ar y ffordd y cawn ein gweld a'n trin. Gall y stereoteipiau hyn arwain at driniaeth annheg a chyfleoedd anghyfartal, gan effeithio ar ein perfformiad academaidd a’n hunan-barch. Er enghraifft, mae cael eich camgymryd yn aml am fyfyriwr Du arall neu gael eich gofyn i siarad ar ran pobl Ddu i gyd mewn trafodaethau, neu hyd yn oed ar lwyfannau mwy, yn brofiadau cyffredin sy’n atgyfnerthu teimladau o ddieithrwch – ac rwy’n siarad o brofiad.

Gall teimladau o ynysigrwydd arwain at orbryder, iselder, a phroblemau iechyd meddwl eraill. Mae diffyg cymuned gefnogol yn cynyddu’r tebygolrwydd o’r heriau hyn ymhellach, gan ei gwneud yn anoddach i fyfyrwyr ymdopi.

Gall dieithrwch arwain at ymddieithrio oddi wrth weithgareddau academaidd. Fel myfyrwyr, os nad ydym yn teimlo ein bod yn cael ein cynnwys neu ein gwerthfawrogi, gall ein cymhelliant i ragori yn academaidd leihau, gan arwain at ganlyniadau academaidd gwaeth.

Mae myfyrwyr Du sy'n profi lefelau uchel o ynysigrwydd yn fwy tebygol o roi'r gorau i'r brifysgol. Mae’r anallu i integreiddio a dod o hyd i rwydwaith cefnogol yn effeithio’n sylweddol ar ein dyfalbarhad a’n llwyddiant mewn addysg uwch, yn enwedig i fyfyrwyr sydd filltiroedd i ffwrdd o’u cymuned gefnogol. Yn aml, nid yw galwadau ffôn adref yn cymharu â rhyngweithiadau personol.

Ymuno â grwpiau myfyrwyr neu eu ffurfio: Roedd cymryd rhan mewn sefydliadau myfyrwyr, yn enwedig y rhai sy'n canolbwyntio ar ddiddordebau pobl Du ac amlddiwylliannol, yn fy helpu'n fawr a gwnaeth roi ymdeimlad o gymuned a pherthyn i mi. Roedd y grwpiau hyn yn cynnig cefnogaeth, cyfeillgarwch, a lle i rannu profiadau cyffredin.

Roedd cymryd rhan weithgar mewn gweithgareddau amrywiol ar y campws hefyd yn fy helpu i gysylltu ag eraill a theimlo fy mod i’n integreiddio’n fwy i gymuned y brifysgol. I eraill, gall y math hwn o gyfranogiad fod yn gam y tu allan i’r arferol, sydd ei angen weithiau, a gall hefyd helpu i chwalu rhwystrau cymdeithasol a lleihau teimladau o ynysigrwydd.

Cymryd rhan mewn llywodraethu myfyrwyr: Ni allaf or-bwysleisio hyn ddigon. Roedd cymryd rhan mewn llywodraeth myfyrwyr o gymorth mawr i mi fel myfyriwr newydd yn y DU. Gallwch hefyd fod yn rhan o bwyllgorau amrywiaeth, a gall y ddau ohonyn nhw ddarparu llwyfan i eirioli dros bolisïau ac arferion mwy cynhwysol ar y campws. Gall y cyfranogiad hwn hefyd feithrin ymdeimlad o rymuso ac ymgysylltu â'r gymuned.

Codi ymwybyddiaeth: Gall gweithio gyda sefydliadau ar y campws i godi ymwybyddiaeth am yr heriau y mae myfyrwyr Du yn eu hwynebu helpu i greu amgylchedd mwy cynhwysol a chefnogol. Gall ymdrechion eiriolaeth arwain at newidiadau gwirioneddol sydd o fudd i'r corff myfyrwyr cyfan, ar y campws ac weithiau y tu hwnt.

Arferion hunanofal: Roedd cymryd rhan mewn gweithgareddau hunanofal yn fy helpu trwy fy nghyfnodau anoddaf. Gweithgareddau mor syml â mynd am dro – nid oes rhaid i chi fynd mor bell ag arferion llym yn y gampfa.Rydw i wedi darganfod bod gorffwys digonol yn hanfodol ar gyfer cynnal llesiant meddyliol. Fe wnaeth ymarferion hunanofal rheolaidd fel gwneud fy arferion gofal croen neu wneud fy ngwallt (steil Affricanaidd) helpu i liniaru effeithiau straen ac ynysigrwydd i mi.

Cael mynediad at wasanaethau iechyd meddwl: Mae llawer o brifysgolion yn cynnig gwasanaethau cwnsela sydd wedi'u teilwra'n benodol ar gyfer myfyrwyr lleiafrifol. Gall manteisio ar yr adnoddau hyn ddarparu cymorth proffesiynol a strategaethau i ymdopi â theimladau o ddieithrwch neu ynysigrwydd.

Technegau ymwybyddiaeth ofalgar ac ymlacio: Rydw i wedi gweld bod ymarfer technegau ymwybyddiaeth ofalgar ac ymlacio er mwyn aros yn synhwyrol ac yn bresennol yn ddefnyddiol iawn. Gall yr arferion hyn helpu i leihau gorbryder a gwella gwydnwch yn erbyn teimladau o ddieithrwch neu ynysigrwydd.

Gall meithrin meddylfryd twf a gweld heriau fel cyfleoedd ar gyfer dysgu a thwf ein helpu i aros yn llawn cymhelliant ac yn wydn. Roedd strategaethau fel hunansiarad cadarnhaol, a thechnegau rheoli straen, hefyd yn strategaethau ymdopi effeithiol a wnaeth fy helpu i reoli ymatebion emosiynol i ynysigrwydd.

Cymunedau a fforymau ar-lein: Roedd ymuno â chymunedau a fforymau ar-lein lle bu myfyrwyr Du yn rhannu eu profiadau, yn cynnig cymorth ac yn rhoi cyngor yn gwneud i mi wybod nad fi oedd yr unig un a oedd yn teimlo’n ynysig ac yn ceisio llywio’r teimladau hyn.Gall cysylltiadau rhithwir ategu rhyngweithiadau wyneb yn wyneb ac ehangu rhwydweithiau cymorth.

Y cyfryngau cymdeithasol ar gyfer eiriolaeth a chymorth: Gall defnyddio platfformau cyfryngau cymdeithasol i gysylltu â mudiadau ehangach a grwpiau eiriolaeth sy’n canolbwyntio ar brofiadau myfyrwyr Du fod yn arf pwerus ar gyfer dod o hyd i gefnogaeth a chael yr wybodaeth ddiweddaraf, neu o leiaf dyna sut y gwnaeth i mi deimlo.

Gosod nodau personol ac academaidd: Fe wnaeth sefydlu nodau clir, cyraeddadwy i gadw ffocws a chymhelliant a dathlu cerrig milltir helpu i roi hwb i fy hunan-barch a rhoi ymdeimlad o gyflawniad i mi pan ddechreuodd y teimladau hyn ymddangos. Ceisiais fyfyrio'n rheolaidd ar gyflawniadau a chynnydd personol, ac fe wnes i ysgrifennu yn fy nyddlyfr llawer! Fe wnaeth fy helpu i gynnal agwedd gadarnhaol ac atgyfnerthu ymdeimlad o bwrpas.

Dylai prifysgolion fynd ati yn weithgar i greu mannau lle mae myfyrwyr Du yn teimlo bod croeso iddynt a’u bod yn cael eu cynnwys. Gall hyn gynnwys sefydlu canolfannau diwylliannol, grwpiau cymorth, a rhwydweithiau sy'n darparu'n benodol ar gyfer anghenion myfyrwyr Du. Mae’r mannau hyn yn rhoi ymdeimlad o gymuned a pherthyn, sy’n hanfodol ar gyfer llesiant meddyliol. Gan siarad o brofiad, mae rhai prifysgolion wedi lansio cynllun o’r enw “cyfaill croeso”. Hanfod hyn yw eich paru â rhywun sydd bron yn agos at adref, i'ch helpu i ymlacio i fywyd yn y brifysgol, oddi cartref. Roedd yn help mawr i mi pan oeddwn newydd gyrraedd y DU i astudio.

Mae cynyddu amrywiaeth cyfadrannau, staff a chyrff myfyrwyr yn hanfodol. Mae cynrychiolaeth yn bwysig a gall gweld pobl sy'n edrych fel chi ac yn deall eich profiadau fod yn hynod ddilys. Dylai prifysgolion hefyd sicrhau bod eu cwricwla yn adlewyrchu safbwyntiau a hanesion amrywiol.

Dylai gwasanaethau iechyd meddwl a chymorth academaidd fod yn ddiwylliannol gymwys. Mae hyn yn golygu cael cwnselwyr a chynghorwyr sydd wedi'u hyfforddi i ddeall a mynd i'r afael â'r heriau unigryw a wynebir gan fyfyrwyr Du. Mae hefyd yn ymwneud â chreu ymwybyddiaeth o ran argaeledd yr adnoddau hyn.

Rhaid i brifysgolion gymryd safiad rhagweithiol yn erbyn hiliaeth a rhagfarn.Mae hyn yn cynnwys gweithredu polisïau a rhaglenni hyfforddi i addysgu cymuned y brifysgol am hiliaeth a'i heffeithiau. Mae hefyd yn gofyn am greu dulliau ar gyfer adrodd achosion o hiliaeth a gwahaniaethu a mynd i'r afael â nhw mewn ffordd effeithiol.Diolch byth, mae'r rhan fwyaf o brifysgolion yn y DU wedi gwneud ymdrechion amlwg i fynd i'r afael â hyn. Er bod unigoliaeth hefyd yn chwarae rhan enfawr wrth fynd i’r afael â hiliaeth a rhagfarn, ni allwn wadu bod ymdrechion yn cael eu gwneud mewn rhyw ffordd yn hyn o beth. Nid yw hynny’n golygu ei fod yn cael ei ddileu’n llwyr nac yn annilysu teimladau unigolion sy’n profi hiliaeth a rhagfarn.