Ydych chi'n gynnar yn eich cyfnod pontio? Dyma erthygl ar wahân gydag awgrymiadau i chi.
Mae cymdeithas yn ddeuaidd iawn, ac mae pobl bob amser yn chwilio am feini prawf a nodweddion i’ch rhoi chi mewn un o’r ddau gategori. Pan fyddan nhw’n cwrdd â chi maen nhw’n debygol o geisio dod o hyd i nodweddion sy’n eich rhoi chi mewn un o’r ddau gategori deuol. Mae hyn yn broblematig i bobl anneuaidd y mae eu hunaniaeth yng nghanol y ddau gategori hyn.
Yn dibynnu ar y ffordd rydych chi’n dewis cyflwyno’ch hun yn gyfforddus, gall hwn fod yn fater nad yw byth yn diflannu’n llwyr. Rwy’n meddwl ei fod yn rhywbeth y mae pobl anneuaidd yn dysgu byw ag ef. Bydd yn cymryd amser, ond rwy’n meddwl eich bod chi’n dod yn unigolyn cryfach o gael eich camryweddu. Ar nodyn cadarnhaol, mae mwy o gydnabyddiaeth o hunaniaethau anneuaidd.
Mae cywiro pobl am eich hunaniaeth yn gallu bod yn flinderus iawn.
Os na fydd pethau’n mynd yn gywir y tro cyntaf, peidiwch â rhoi’r ffidil yn y to. Taith yw hi.
Does byth brys i ddod allan.
Os gwnewch chi gofio unrhyw beth o’r erthygl hon, cofiwch hyn:
Mae trawsnewid a dod allan yn daith bwysig
Cymerwch eich amser, does dim brys o gwbl
Gall fod yn daith anodd, ond byddwch chi’n bennu lan yn gryfach ac yn hapusach o ganlyniad iddi
Mae’n iawn gwneud camgymeriadau neu newid eich meddwl ar bethau
Byddwch yn garedig tuag atoch chi’ch hun
Byddwch yn ddiogel
Does dim un ffordd gywir o drawsnewid
1. Pwyso a mesur barn pobl eraill
Mae’n bwysig pwyso a mesur a ydyw’n ddiogel dod allan ai peidio cyn i chi benderfynu gwneud hynny. Gall gofyn cwestiynau cynnil, neu wneud sylwadau sy’n datgelu pa mor oddefgar yw unigolyn, fod yn ffordd dda o wneud hyn. Rhai enghreifftiau fyddai, ‘Roedd rhywun wedi dod allan fel unigolyn traws / anneuaidd yn fy ysgol / gweithle i, a dydw i ddim yn gwybod sut i deimlo am y peth. Beth wyt ti’n ei feddwl?’, neu ‘Mae llawer o sôn wedi bod am bobl draws yn y newyddion yn ddiweddar?’. Gallai brawddegau o’r fath ysgogi unigolyn i rannu ei farn ar y gymuned draws. Cofiwch, os byddai dod allan yn achosi niwed i chi mewn unrhyw ffordd, does dim angen i chi ddod allan eto. Does dim rhaid i chi esbonio pwy ydych chi i neb.
2. Dod allan go iawn
Unwaith y byddwch chi wedi penderfynu a ydyw’n ddiogel dod allan ai peidio, gallwch chi benderfynu sut yr hoffech chi ddod allan. Gall hon fod yn sgwrs anodd, hyd yn oed os ydych chi’n gwybod y bydd pobl yn eich derbyn chi fel yr ydych chi. Os byddai’n anodd cael y sgwrs ar goedd am ba reswm bynnag, gallwch chi ysgrifennu llythyr yn lle hynny. Gall hyn fod yn ffordd haws o ddweud popeth rydych chi am ei ddweud heb ymyrraeth.
Peidiwch â dod allan i bawb ar yr un pryd. Dewch allan yn raddol. Dechreuwch drwy ddweud wrth y bobl rydych chi’n ymddiried ynddyn nhw fwyaf, a gorffennwch drwy ddod allan i bawb. Os ydych chi’n teimlo nad yw hynny’n gwbl ddiogel, does dim rhaid ichi ddod allan yn gyfan gwbl. Yn lle hynny, dewiswch enw niwtral a dywedwch ei fod yn llysenw y mae eich ffrindiau’n ei ddefnyddio ar eich cyfer. Os ydych chi’n ddibynnol ar rywun, crëwch grŵp cymorth mwy i chi’ch hun. Os ydych chi’n dod allan i’ch teulu, gwnewch gynlluniau rhag ofn nad ydyn nhw’n eich cefnogi.
Mae’n bwysig pwysleisio y gall dod allan fod yn hwyl hefyd os ydych chi yng nghwmni’r bobl gywir. Gallwch chi greu arddangosfa greadigol, cerdyn, cacen ac ati i roi gwybod i bobl am eich hunaniaeth. Mae llawer o wahanol ffyrdd i chi allu dod allan, ac mae pob un ffordd yn ddilys. Chi sydd i benderfynu ar y ffordd orau i ddod allan o ystyried eich sefyllfa chi.
3. Bywyd ar ôl dod allan
Ar ôl dod allan, gallwch chi ddisgwyl bod gan bobl gwestiynau am eich hunaniaeth. Chi ddylai benderfynu faint o wybodaeth rydych chi am ei rhannu. Os bydd cwestiwn yn eich gwneud chi’n anghyfforddus, nid oes angen i chi ei ateb. Mae llawer o bobl draws ac anneuaidd mewn sefyllfa lle maen nhw’n dod allan yn gyson i bobl newydd sydd o’u cwmpas wrth gyflwyno’u hunain.
Casgliad
Os ydych chi wedi cyrraedd mor bell â hyn, gobeithio bod yr erthygl wedi bod yn ddefnyddiol i chi. Yn ddi-os, mae’n debygol nad ydw i wedi cynnwys yr holl gyngor posibl sydd i’w gael i bobl draws sydd yn gynnar yn y broses o drawsnewid, neu sy’n ystyried dod allan cyn bo hir. Wedi dweud hynny, dwi’n meddwl mai ychydig iawn o adnoddau (neu ddim o gwbl) sy’n llwyddo i gwmpasu popeth. Yn hytrach, mae’r cyngor y mae pobl yn ei ddefnyddio yn y broses o drawsnewid yn deillio o gymaint o ffynonellau gwahanol. Mae’r holl gyngor wedi’i greu gan gynifer o bobl wahanol, ac yn cwmpasu cymaint o wahanol brofiadau o fod yn draws ac yn anneuaidd. Felly, dwi’n ymbil arnoch chi i gael cyngor gan gynifer o ffynonellau gwahanol â phosibl er mwyn dysgu gwersi o amrywiaeth eang o brofiadau, nid yn unig i’ch cynorthwyo chi, ond hefyd i wneud i chi deimlo’n fwy cysylltiedig â’r gymuned.
